Frantzisko aita santuak, Vatikanoko II. Kontzilioaren arabera, Eliza sinodala egiteko
Jainkoaren Herri osoari dei egin diola ikusirik eta berak dioenari jaramon egin nahirik,
alegia, aintzat hartuz «garrantzitsua dela tokiko elizak sinodo-bidean sartzea –aldi
desberdinetan eta behetik–», beharrezkoa dela “elkarrizketa Jainkoaren Herrian, batez ere
apaizen eta laikoen artean” eta “horrek eskatzen duela, besteak beste, Elizaren, apaiz
ministerioaren, laikoen, eliz erantzukizunen eta gobernu eginkizunen zenbait ikuspegi
bertikalista, desitxuratu eta partzial eraldatzea”, aita santuaren deiari erantzun dio
Gipuzkoako Kristauak taldeak eta hirurehun bat eliztar, gizon-emakume laiko, erlijiosa-
erlijioso, eta apaiz, elkartu gara hilaren 11n Donostiako Jaungoikoa Gure Aita
parrokian, “Guztion arteko eliza guztiontzat-Una iglesia entre todos y para todos”
goiburuaz.
Sakoneko auzia
Jesus Martinez Gordo Bilboko elizbarrutiko teologoak lagundu digu abiatzen. Berak
dioenez, «bere aurrekoen aldean, Frantzisko da Jainkoaren Herri guztiaren
protagonismoa berreskuratu eta eragiten duen lehenbiziko aita santua». Teologo
bizkaitarraren arabera, «sinodaltasunari buruzko Sinodo honen funtsezko auzi
teologikoa» zera da: «apaiz ministerioak Elizaren gobernuan eta irakaspenean daukan
“plus”-a», laikoek ez bezala. J. Martinez Gordok dioenez «pentsamendu hau sarri
entzuten da gaur egun eta, nire ustez, arrazoiz hornitzen du –era okerrean, jakina–
klerikalismoa, historian zehar mortala gertatu dena, bere kalteaz orain hobeto
jabetzen garelarik».
Apiril arteko urratsak
Gipuzkoako Kristauak taldeak, Eliza sinodal baterako prozesuari ekarpen zehatzak
egiteko, bi galdera proposatu ditu kristau elkarteetan lantzeko:
- Zertan datza gaur egun bidea elkarrekin egitea: gure parrokietan eta
elizbarrutian zer bizi izan dugu eta zer bizi dugu gaur.
- Zer urrats egin behar ditugu gure parrokietan eta elizbarrutian “bidea
elkarrekin egite” horretan hazteko, alegia, zer bitartekok lagun diezagukete
urratsak egiten, zer aldatu edo baztertu beharko litzateke urratsak elkarrekin
egiten hasteko eta zer indartu edo zeri ekin beharko litzaioke.
Egindako bidea berreskuratzen
Sinodaltasun bide hau egiteko Gipuzkoako Kristauak taldeak gogorarazi du ez garela
hutsetik hasten. Frantzisko aita santuak Eliza sinodal baten alde egindako deiari, gure
Elizbarrutiak iraganean bideari ekiteko izan zuen espiritu bera igarri zaio: 80ko
hamarkadan jada, “Elkarte-kutsu handiagoa eta ebanjelizatzaileagoa duen eliza”
goiburua hartu zuen gure Elizbarrutiak eta, arrasto berean, 1999an “Eliza ebanjelioaren
zerbitzura” agiria onartu zen, laikoaren, ordena erlijiosoen eta apaizen
partaidetzarekin. Orain ere aurrera egin nahi dugu bidean elkarrekin, senide-
elkartasunean, parte-hartzeaz, misioari emanak, Ebanjelioa bizitzeko eta hots egiteko.
